गोरखा–१ मा रास्वपाका सुधन गुरुङको फराकिलो अग्रता, गोरखा–२ मा कवीन्द्र बुर्लाकोटी विजयी

गोरखा, फागुन २५ गते । प्रतिनिधिसभा निर्वाचन अन्तर्गत गोरखा–१ मा जारी मतगणनामा राष्ट्रिय स्वतन्त्र पार्टी (रास्वपा) का उम्मेदवार सुधन गुरुङ फराकिलो मतान्तरसहित अग्रस्थानमा देखिएका छन्। हालसम्मको मतगणना अनुसार गुरुङले २४ हजार ५१ मत प्राप्त गरेका छन्।

उनका निकटतम प्रतिद्वन्द्वी नेपाली कांग्रेसका प्रेमकुमार खत्रीले १३ हजार ५११ मत ल्याएका छन्। त्यस्तै नेकपाका हरिराज अधिकारीले १० हजार २३१ मत प्राप्त गरेका छन् भने नेकपा एमालेका राम चन्द्र लामिछानेले तीन हजार ८० मत पाएका छन्।

गोरखा–१ मा मतगणना जारी रहँदा गुरुङले उल्लेख्य मतान्तर कायम गर्दै अग्रता लिइरहेका छन्।

यसैबीच, गोरखा–२ मा भने राष्ट्रिय स्वतन्त्र पार्टीका महामन्त्रीसमेत रहेका कवीन्द्र बुर्लाकोटी हिजै सम्पन्न मतगणनाबाट फराकिलो मतान्तरसहित विजयी भइसकेका छन्। गोरखाका दुवै निर्वाचन क्षेत्रमा रास्वपाले बलियो उपस्थिति देखाएको छ।