जेन जि आन्दोलन दमनमा संलग्न अधिकारीमाथि कारबाहीको माग, सरकारलाई संगठनको चेतावनी

काठमाडौं, चैत १४ गते । जेन जि मुभमेन्ट नेपालले जेन जि आन्दोलनका क्रममा भएको दमनका घटनामा तत्कालीन प्रधानमन्त्री, गृहमन्त्रीसहित संलग्न सुरक्षा निकायका जिम्मेवार व्यक्तिहरूलाई तत्काल पक्राउ गरी कारबाही अघि बढाउन सरकारसँग माग गरेको छ।

संगठनले जारी गरेको प्रेस विज्ञप्तिमा आन्दोलन दमनमा प्रत्यक्ष भूमिका खेलेका सबै पक्षमाथि निष्पक्ष छानबिन गर्नुपर्ने र कुनै दोषीलाई उन्मुक्ति नदिनुपर्ने स्पष्ट पारेको छ। विज्ञप्तिमा कानुनी राज्यको मर्मअनुसार जिम्मेवार पदमा रहेका व्यक्तिहरूलाई पनि कानुनको दायरामा ल्याउनु अनिवार्य भएको उल्लेख गरिएको छ।

साथै, दमनकारीलाई जोगाउने कुनै पनि प्रयास भए त्यसको कडा प्रतिवाद हुने चेतावनी समेत दिइएको छ। संगठनले भनेका छन्, “यदि यस्ता षड्यन्त्रहरू गरिए भने देशभरिका युवाहरू थप सशक्त र कठोर संघर्षमा उत्रिनेछन्।”

संगठनले सरकारलाई शान्ति, सुव्यवस्था र अराजकताको अन्त्य सुनिश्चित गर्न संवेदनशील र जिम्मेवार बन्न आवश्यक भएकोमा जोड दिंदै नागरिकहरूको सुरक्षा, अधिकारको प्रत्याभूति र विधिको शासन कायम गर्नु राज्यको प्रमुख दायित्व भएको स्मरण गराएको छ।

जेन जि आन्दोलनसँग सम्बन्धित घटनाको निष्पक्ष छानबिन र दोषीमाथि कारबाहीको माग पछिल्लो समय अझ सशक्त रूपमा उठ्न थालेको छ।

जेन जि मुभमेन्ट नेपालले राखेको प्रेस वक्तव्य यस्तो छ हेर्नुहोस्।