जातीय छुवाछुत अन्त्यका लागि एकजुट हुन सांसद ज्ञानेन्द्र शाहीको आह्वान

काठमाडौं, चैत १५ गते । ज्ञानेन्द्र शाहीले जातीय छुवाछुत अन्त्यका लागि सबै नागरिक एकजुट हुन आह्वान गरेका छन्।

राष्ट्रिय स्वतन्त्र पार्टीबाट उम्मेदवारी दिई सांसद पदमा विजयी भएका शाहीले सामाजिक सञ्जाल फेसबुकमार्फत आफ्नो धारणा सार्वजनिक गर्दै कानुनी व्यवस्था भए पनि समाजमा अझै जातीय विभेद कायम रहनु दुःखद रहेको बताएका हुन्।

उनले नेपालमा जातीय छुवाछुत अन्त्य गर्नका लागि नयाँ मुलुकी ऐन २०२० लागू भएको झन्डै ६२ वर्ष बितिसक्दा पनि व्यवहारमा विभेद पूर्ण रूपमा हट्न नसकेको उल्लेख गरेका छन्।

शाहीले कानुनले निषेध गरिसकेको प्रथा अझै पनि समाजमा देखिनु गम्भीर विषय भएको भन्दै अब सबै नागरिक सचेत बन्ने, आवाज उठाउने र यस्तो अमानवीय अभ्यास अन्त्यका लागि संगठित रूपमा लाग्नुपर्ने आवश्यकता औंल्याएका छन्।

उनले जातीय छुवाछुत गर्ने जो कोहीलाई कडाभन्दा कडा कारबाही गर्नुपर्ने पनि बताएका छन्। “मानवता भन्दा ठूलो कुनै जात हुँदैन,” भन्दै उनले समानता, सम्मान र सहअस्तित्वमा आधारित समाज निर्माणका लागि सबैलाई हातेमालो गर्न आग्रह गरेका छन्।