सुरुङ मार्ग परियोजनामा ३१ करोड संकलनपछि हिसाब गायब: विशालराज महतको कडा चेतावनी—“अब जनताले जवाफ खोज्छन्”

हेटौंडा, चैत १६ गते । हेटौंडामा प्रस्तावित सुरुङ मार्ग निर्माण परियोजनाको नाममा संकलित करोडौँ रुपैयाँको पारदर्शिता माथि गम्भीर प्रश्न उठेको छ। सामाजिक अभियन्ता तथा संस्थाका अध्यक्ष विशालराज महतले सामाजिक सञ्जाल मार्फत कडा प्रतिक्रिया जनाउँदै परियोजनामा संलग्न पक्षहरूलाई तत्काल जवाफदेही बन्न चेतावनी दिएका छन्।

उनका अनुसार “पूर्वाधार विकास”को नाममा सर्वसाधारणबाट करिब ३१ करोड ७६ लाख रुपैयाँ उठाइएको भए पनि वर्षौँ बित्दा समेत न त परियोजनाको प्रगति देखिएको छ, न त लगानीको स्पष्ट हिसाब सार्वजनिक गरिएको छ। यसलाई उनले “जनताको पसिना माथिको ठगी र विश्वासघात”को संज्ञा दिएका छन्।

महतले हेटौंडाका सर्वसाधारणले गाई–बाख्रा बेचेर, ऋण लिएर, यहाँसम्म कि पेन्सनको रकमसमेत लगानी गरेको उल्लेख गर्दै यो विषयलाई सामान्य रूपमा लिन नसकिने बताएका छन्। “यो खेलौना होइन, जनताको रगत–पसिनाको कमाइ हो,” उनले भनेका छन्।

उनले परियोजनासँग सम्बन्धित प्रमुख व्यक्ति कुसकुमार जोशी तथा सञ्चालकहरूलाई सार्वजनिक रूपमा प्रश्न गर्दै उनीहरू किन मौन रहेको भनी जिज्ञासा राखेका छन्। साथै, सम्बन्धित सरकारी निकाय र नियामक संस्थाहरू पनि किन निष्क्रिय रहेको भन्दै ध्यानाकर्षण गराएका छन्।

महतले अब चुप लागेर बस्ने समय सकिएको स्पष्ट पार्दै प्रत्येक रुपैयाँको हिसाब सार्वजनिक गर्न, दोषीलाई कानुनी दायरामा ल्याउन र लगानीकर्ताको हित सुरक्षित गर्न माग गरेका छन्। उनले चेतावनी दिएका छन् कि यदि छानबिन प्रक्रिया अघि नबढे जनस्तरबाट दबाब सिर्जना गरिनेछ र यो मुद्दा सडकदेखि अदालतसम्म पुग्नेछ।

उनले सेयर होल्डरहरूलाई आफ्नो प्रमाणपत्र सुरक्षित राख्न आग्रह गर्दै आगामी दिनमा सशक्त आन्दोलनको संकेतसमेत दिएका छन्।