त्रिभुवन विमानस्थलमा सुधारको पहल: मन्त्री गनेस पौडेल र सांसदहरूको स्थलगत अनुगमन, सेवा प्रवाह सुधार्ने प्रतिबद्धता

काठमाडौँ, चैत १७ गते । संस्कृति, पर्यटन तथा नागरिक उड्डयन मन्त्री गनेस पौडेल सहितको टोलीले आज त्रिभुवन अन्तर्राष्ट्रिय विमानस्थलमा स्थलगत अनुगमन गरेको छ। उक्त अनुगमनमा काठमाडौं–४ का प्रतिनिधि सभा सदस्य पुकार बम तथा मकवानपुरका सांसद प्रशान्त उप्रेती समेत सहभागी थिए।

सांसद उप्रेतीले सामाजिक सञ्जालमार्फत जानकारी दिँदै विमानस्थलको अवस्था सुधार गर्न गरिएको अनुगमन औपचारिकतामात्र नभई जिम्मेवारीबोध र परिणाममुखी कदम भएको बताएका छन्। उनका अनुसार अनुगमनका क्रममा यात्रुहरूले भोग्दै आएका विभिन्न समस्या, असुविधा तथा सुरक्षासम्बन्धी चिन्तालाई नजिकबाट अवलोकन गरिएको थियो।

विमानस्थलमा देखिएका भीड व्यवस्थापन, सेवा प्रवाहको ढिलासुस्ती तथा यात्रु सुरक्षासँग सम्बन्धित विषयहरूलाई प्राथमिकताका साथ सम्बोधन गर्न सम्बन्धित निकायलाई स्पष्ट निर्देशन दिइएको पनि उनले जनाएका छन्। “जनताका गुनासोलाई कागजमा मात्र सीमित नराखी स्थलगत रूपमा समाधानतर्फ अघि बढेका छौँ,” उनले उल्लेख गरेका छन्।

सरकारको प्राथमिकता ‘Action — Work — Result’ रहेको उल्लेख गर्दै सेवा प्रवाहलाई छिटो, सुरक्षित र प्रभावकारी बनाउनेतर्फ ध्यान केन्द्रित गरिएको सांसद उप्रेतीको भनाइ छ। उनले नागरिकको सुविधा, सुरक्षा र सम्मानमा कुनै सम्झौता नहुने स्पष्ट पारे।

अनुगमनपछि विमानस्थल व्यवस्थापनमा सुधार ल्याउने, यात्रु सेवा प्रभावकारी बनाउने तथा सुरक्षालाई थप मजबुत बनाउने प्रतिबद्धता जनाइएको छ। यसले त्रिभुवन अन्तर्राष्ट्रिय विमानस्थलको सेवा गुणस्तरमा सुधार आउने अपेक्षा गरिएको छ।