प्रहरी नायब निरीक्षक सईमाथि शुक्रबार राति खुकुरी प्रहार

गए राती शुक्रबार कञ्चनपुरको दोधारा चाँदनीमा खटिएका एक सशस्त्र प्रहरी नायब निरीक्षक (सई) माथि खुकुरी प्रहार भएको छ । दोधारा चादँनी नगरपालिका-७,कञ्चभोजमा रहेको सशस्त्र प्रहरी बलको बीओपीका प्रमुख सशस्त्र प्रहरी नायब निरीक्षक (सई) नरेन्द्र चैँसिरमाथि चार/पाँच जनाको युवा समूहले खुकुरी प्रहार गरी घाइते बनाएको छ ।

सशस्त्र प्रहरीमाथि खुकुरी प्रहार गर्ने युवाको खोजी कार्य भैरहेको सशस्त्र प्रहरी बल ३५ नम्बर गणका गणपति सशस्त्र प्रहरी उपरीक्षक (एसपी) प्रेम रावलले बताए । ‘जोगबूढा झोलुंगे पुल नजिकैको पसलमा मादक पदार्थ सेवन गरेर हो-हल्ला गरिरहेका युवाहरूलाई सम्झाउँदा उल्टै खुकुरी प्रहार गरी भागे,’ सशस्त्र प्रहरी उपरीक्षक रावलले भने, ‘खुकुरी प्रहार गर्नेको पहिचान भइसकेको छ, खोजीकार्य जारी छ ।’

ड्युटीमा रहेका प्रहरी कर्मचारीमाथि खुकुरी प्रहार गर्ने स्थानीय रोहन बइक र रोशन दमाईंलगायतका युवा समूह छन् । सशस्त्र प्रहरीका अनुसार खुकुरी प्रहार गर्नेलाई कडाभन्दा कडा कानूनी कारबाही हुन्छ,’ रावलले भने, ‘त्यसका लागि नेपाल प्रहरीसित पनि समन्वय भइरहेको छ ।’