पर्वतमा जिप दुर्घटनामा परि एक बालिकाको मृत्यु, ११ जना घाइते

पर्वत । पर्वतको कुश्मा नगरपालिका–३, दुर्लुङको गौडामुनिमा गएराति जिप दुर्घटना हुँदा एक बालिकाको मृत्यु भएको छ भने ११ जना घाइते भएका छन् ।

सदरमुकाम कुश्माबाट दुर्लङका लागि छुटेको ग १ ज ५२२९ नंको जीप दुर्घटनामा हुँदा कुश्मा–३ की ७ वर्षीया बालिका शीतल विकको मृत्यु भएको जिल्ला ट्राफिक प्रहरी कार्यालय पर्वतले जनाएको छ ।

प्रहरीका अनुसार, दुर्घटनामा परेर टाउको र आँखामा गम्भीर चोट लागेकी गम्भीर घाइते भएकी उनको उपचारकै क्रममा पर्वत अस्पतालमा मृत्यु भएको हो ।

सोही स्थानका ४ वर्षीय प्रिन्स क्षेत्री र ५० वर्षीया चन्द्रकला क्षेत्रीलाई थप उपचारका लागि गण्डकी अस्पताल पोखरा पठाइएको छ ।

दुर्घटनामा परी दुर्लुङकै ३ वर्षीय सौरभ विक, २३ वर्षीया शान्ति विक, ७० वर्षीय कृष्णप्रसाद पाध्या, १६ वर्षीय निशान परियार, ५५ वर्षीया हीरादेवी मगर, ३५ वर्षीय मीनबहादुर क्षेत्री, ४७ वर्षीय अमृत शर्मा, ७६ वर्षीय भजत शर्मा, पोखरा बस्ने १६ वर्षीय अमर विक घाइते भएका छन् ।

जिप सडकबाट करिब ३०–३५ मिटर तल खसेको थियो । जिपका चालकलाई प्रहरीले नियन्त्रणमा लिई घटनाको बारेमा आवश्यक अनुसन्धान गरिरहको जनाएको छ ।